نئی دہلی: (ویب ڈیسک) بھارت کی سپریم کورٹ نے اشوکا یونیورسٹی کے پروفیسر علی خان محمود آباد کو ضمانت پر رہا کرنے کا حکم دے دیا۔
پروفیسر علی خان نے 8 مئی کو کی گئی ایک پوسٹ میں لکھا تھا کہ’میں بہت سے دائیں بازو کے مبصرین کو کرنل صوفیہ قریشی کی تعریف کرتے ہوئے دیکھ کر خوش ہوں لیکن شاید یہ لوگ اسی طرح گھروں کو مسمار کرنے اور بی جے پی کی منافرت سے متاثرہ افراد کے لیے آواز اٹھا سکتے ہیں تاکہ ان لوگوں کو انڈین شہری ہونے کے ناطے تحفظ دیا جائے‘۔
اس پوسٹ کے چند دن بعد اشتعال پھیلانے کے الزامات عائد کرتے ہوئے پروفیسر علی خان کو گرفتار کر لیا گیا تھا، تاہم اب اطلاعات ہیں کہ بھارتی سپریم کورٹ نے پروفیسر علی خان کو ضمانت پر رہا کر دیا ہے۔
عدالت نے پروفیسر علی خان کو پابند کیا ہے کہ وہ اپنی زیر تفتیش پوسٹوں سے متعلق آن لائن کچھ بھی لکھیں گے اور نہ بولیں گے۔
دوسری جانب اپوزیشن جماعتوں نے پروفیسر علی خان کی گرفتاری کی مذمت کرتے ہوئے فوری رہائی کا مطالبہ کیا تھا۔
