نئی دہلی: (دنیا نیوز) بھارت کو بڑا دھچکا، برازیل نے آکاش میزائل خریداری کے مذاکرات ختم کر دیئے۔
بھارت کو آپریشن سندور میں عبرتناک شکست کے بعد عالمی سطح پرہزیمت کا سامنا ہے، برازیل نے بھارت کے آکاش میزائل سسٹم کی خریداری کے لیے مذاکرات ختم کر دیئے۔
ڈیفنس ایکسپریس کے مطابق مذاکرات کا اختتام بھارت کی جانب سے سسٹم کا جدید ترین ورژن فراہم نہ کرنے پر ہوا، برازیلی فوج درمیانے سے طویل رینج کے فضائی دفاعی نظام کی تلاش میں ہے۔
بھارتی کمپنیوں نے صرف آکاش کا پرانا ورژن فراہم کرنے کی پیشکش کی، برازیل نے اس پرانے ورژن کو فرسودہ قرار دے کر مسترد کر دیا۔
ڈیفنس ایکسپیرس کے مطابق معاہدے کی مجموعی مالیت تقریباً 5 ارب بھارتی روپے ہے، مذاکرات کے ختم ہونے کے بعد برازیل نے اٹلی کے ساتھ بات چیت کا آغاز کیا۔
دکن ہیرالڈ کے مطابق برازیل اب اطالوی ایئر ڈیفنس سسٹم EMADS حاصل کرنے پر غور کر رہا ہے، معرکہ حق میں شکست کے بعد بھارتی ہتھیاروں کی ساکھ بری طرح متاثر ہوئی ہے۔
