شارجہ: (ویب ڈیسک) متحدہ عرب امارات (یو اے ای) کی ریاست فجیرہ میں خاتون سے ایک لاکھ 95 ہزار درہم (تقریباََ ڈیڑھ کروڑ پاکستانی روپے) کی چوری میں ملوث 2 چوروں کو محض 3 گھنٹوں میں گرفتار کر لیا گیا۔
اماراتی حکام کے مطابق دونوں ملزمان کو شارجہ سے گرفتار کیا گیا، ملزمان نے خاتون کو چکمہ دے کر ان سے رقم چرائی، خاتون بینک سے رقم نکال کر گاڑی میں گھر جا رہی تھی جس دوران دونوں چور بینک سے خاتون کی گاڑی کا پیچھا کرتے رہے۔
حکام کے مطابق قریب پہنچ کر ایک ملزم نے خاتون کو کہا کہ گاڑی کے ٹائر میں خرابی ہے، خاتون گاڑی روک کر ٹائر دیکھنے نکلیں تو دوسرا چور گاڑی سے رقم اٹھا کر فرار ہوگیا، گرفتار ملزمان امارات کے دیگر مقامات پر بھی اسی طرح کی وارداتوں میں ملوث نکلے۔
