انقرہ: (ویب ڈیسک) ترکیہ نے غزہ میں اسرائیلی خلاف ورزیاں جنگ بندی کے دوسرے مرحلے کیلئے خطرناک قرار دیدیں۔
عالمی میڈیا کی رپورٹ کے مطابق ترکیہ کے وزیر خارجہ ہاکان فیدان نے کہا ہے کہ میامی میں غزہ کے حوالے سے ہونے والا اجلاس شرم الشیخ کے بعد سب سے اہم اجلاس تھا جس میں جنگ بندی کے پہلے مرحلے کے معاہدے میں موجود مسائل پر تفصیلی تبادلہ خیال کیا گیا۔
ہاکان فیدان نے واضح کیا کہ جنگ بندی کی خلاف ورزیاں امن کے منصوبے کو خطرے میں ڈال رہی ہیں اور دوسرے مرحلے میں منتقلی کے لیے سنگین رکاوٹ بن رہی ہیں، اسرائیل کی مسلسل خلاف ورزیاں اس راستے کو مزید پیچیدہ کر رہی ہیں۔
انہوں نے بتایا کہ اجلاس میں فریقین نے ان خدشات پر اتفاق کیا اور خلاف ورزیوں کو روکنے اور ان کے دہرائے جانے سے بچنے کے طریقوں پر مشاورت کی، دوسرے مرحلے کے حوالے سے انہوں نے زور دیا کہ چار ثالث ممالک امریکا، ترکیہ، مصر اور قطر کے درمیان مربوط تعاون جاری رہنا چاہیے۔
ترکیہ کے وزیر خارجہ نے بتایا کہ اجلاس میں غزہ کی تعمیر نو کے لیے ابتدائی اقدامات پر بات کی گئی اور انہیں ابتدائی طور پر زیر غور لایا گیا، انہوں نے کہا کہ ترکیہ کا غزہ سے متعلق موقف تین بنیادی اصولوں، غزہ کی انتظامیہ فلسطینی عوام کے ہاتھ میں ہو، غزہ کی زمین کو تقسیم نہ کیا جائے اور تمام اقدامات غزہ کے عوام کے مفاد میں ہوں۔
