کوپن ہیگن: (دنیا نیوز) ڈنمارک نے گرین لینڈ پر قبضے کی دھمکیاں ناقابل قبول قرار دے دیں۔
ڈینش وزیراعظم میٹ فریڈرکسن نے کہا کہ امریکی صدر ڈونلڈ ٹرمپ کی دھمکی کے بعد تاریخی موڑ پر کھڑے ہیں، امریکا کی دھمکیوں نے نیٹو کی بنیادوں کو ہلا دیا، امریکا نے نیٹواتحاد سے منہ موڑا تو سب ختم ہو جائے گا۔
میٹ فریڈرکسن نے مزیدکہا کہ طاقت کا استعمال ہوا تو ہماری تیاری بھی مکمل ہے۔
واضح رہے کہ اس سے پہلے ڈنمارک کے وزیر دفاع نے خبردار کیا تھا کہ گرین لینڈ پر حملے کی صورت میں گولی پہلے ماریں گے سوال بعد میں پوچھیں گے، اپنے بیان میں وزیر دفاع ڈنمارک نے گرین لینڈ پر حملے کی صورت میں امریکا کو وارننگ دیتے ہوئے کہا تھا کہ حملہ ہوا تو مسلح افواج احکامات کا انتظار کئے بغیر فوری جواب دیں گی، گرین لینڈ ڈنمارک کے اندر ایک خود مختار علاقہ ہے۔
اس سے قبل 7 یورپی ممالک نے اپنے ایک مشترکہ بیان میں کہا تھا کہ گرین لینڈ کے معاملے پر فیصلہ کرنے کا حق صرف گرین لینڈ اور ڈنمارک کو حاصل ہے۔
دوسری جانب امریکی نائب صدر جے ڈی وینس نے گرین لینڈ کے معاملے پر یورپی رہنماؤں کو خبردار کرتے ہوئے کہا تھا کہ اگر یورپ نے گرین لینڈ کی سکیورٹی کو سنجیدہ نہ لیا تو امریکا کارروائی کر سکتا ہے۔
امریکی نائب صدر کا مزید کہنا تھا کہ گرین لینڈ عالمی میزائل دفاع کیلئے نہایت اہم ہے، بعض مخالف طاقتوں نے گرین لینڈ میں دلچسپی کا اظہار کیا ہے۔
