پاک فوج ملکی ترقی و خوشحالی کیلئے ہر ممکن تعاون کرے گی: آرمی چیف

Published On 28 August,2023 07:37 pm

اسلام آباد: (دنیا نیوز) نگران وزیراعظم انوار الحق کاکڑ کے زیر صدارت ایس آئی ایف سی ایپکس کمیٹی کا اجلاس ہوا، اجلاس میں چیف آف آرمی سٹاف جنرل سید عاصم منیر نے بھی شرکت کی۔

چیف آف آرمی سٹاف جنرل سید عاصم منیر نے معیشت کی بحالی کے لیے نگران حکومت کو مکمل تعاون کی یقین دہانی کرا دی، انہوں نے کہا کہ پاک فوج پاکستان کو ترقی اور خوشحالی کی راہ پر گامزن کرنے کے لیے ہر ممکن تعاون کرے گی۔

یہ بھی پڑھیں: بجلی کے بھاری بلوں پر احتجاج میں تیزی، شہر شہر مظاہرے، شٹر ڈاؤن ہڑتال

اس موقع پر نگران وزیر اعظم نے ہدایت کی کہ جن منصوبوں کی نشاندہی کی گئی ان کی جلد تکمیل یقینی بنائی جائے، ایپکس کمیٹی نے ملکی معیشت کی بحالی کے لیے ایس آئی ایف سی کے اقدامات پر اطمینان کا اظہار کیا۔

ایپکس کمیٹی کے اجلاس میں وزراء اعلیٰ، نگران وفاقی وزراء، صوبائی وزراء اور اعلیٰ سول و عسکری حکام نے شرکت کی۔

اعلامیہ کے مطابق نگران وزیر اعظم نے خصوصی سرمایہ کاری کونسل کے موثر کام کی تعریف کی، ایپکس کمیٹی نے کونسل کی عالمی سطح پر رسائی حاصل کرنے کی حکمت عملی اور برادر، دوست ممالک کے ساتھ روابط کو سراہا۔

یہ بھی پڑھیں: عوام کو بجلی بلوں میں کتنا ریلیف ملے گا؟ پلان کے نکات سامنے آگئے

اجلاس میں سعودی عرب اور اسلامک آرگنائزیشن فار فوڈ سکیورٹی کے اعلیٰ سطح کے وفود کے دوروں کو نتیجہ خیز قرار دیا گیا، ایپکس کمیٹی نے ملکی معیشت کی بحالی کی طرف مثبت رفتار کو برقرار رکھنے میں اپنے عزم اور حمایت کا اظہار کیا۔

ایپکس کمیٹی نے زراعت، لائیو سٹاک، معدنیات، آئی ٹی اور توانائی کے کلیدی شعبوں میں سرمایہ کاری کو راغب کرنے کے لیے پچھلی حکومت کے منظور کردہ منصوبوں کی بھی توثیق کی، نگران وزیر اعظم نے شناخت شدہ منصوبوں کی تکمیل میں تیزی لانے کی ہدایت کی۔