اسلام آباد: (دنیا نیوز) خصوصی سرمایہ کاری سہولت کونسل (ایس آئی ایف سی) کی معاونت سے سعودی عرب کے ساتھ تجارتی تعلقات میں اضافے سے ملکی معیشت کو فروغ مل رہا ہے۔
پاکستان کی سعودی عرب کو برآمدات میں 22 فیصد اضافہ، تجارتی حجم 546 ملین ڈالر سے بڑھ کر 700 ملین ڈالر تک پہنچ گیا ہے، سعودی سرمایہ کاروں نے پاکستان کے توانائی، زراعت، آئی ٹی اور تعمیراتی شعبوں میں سرمایہ کاری کرنے میں دلچسپی کا اظہار کیا ہے۔
پاک سعودی عرب آئی ٹی خدمات کی برآمدات 50 ملین ڈالر سے بڑھا کر 100 ملین ڈالر تک پہنچانے کا ہدف مقرر کیا گیا ہے، سعودی عرب کی جانب سے پاکستانی آئی ٹی کمپنیوں کی رجسٹریشن کے عمل میں سہولت کاری کیلئے ہیلپ ڈیسک کا قیام عمل میں لایا گیا ہے۔
معروف سعودی فوڈ چین ’’البیک‘‘ کا پاکستان میں اپنی برانچز کھولنے کا اعلان خوش آئند ہے جس سے روزگار کے مواقع متوقع ہیں۔
ایس آئی ایف سی کے تعاون سے سعودی عرب کے ساتھ تجارتی تعلقات کا فروغ اقتصادی روابط میں استحکام کا ضامن ہے۔
