لاہور: (مدثر علی رانا) رواں ماہ کے دوران مزید 1 ہزار یوٹیلیٹی سٹورز کو بند کرنے کا فیصلہ کر لیا گیا۔
ڈاکٹر فاروق ستار کی زیرصدارت قومی اسمبلی کی قائمہ کمیٹی برائے نجکاری کا اجلاس ہوا جس میں اہم فیصلے کئے گئے۔
اجلاس میں حکام نے بریفنگ دیتے ہوئے بتایا کہ ابھی تک یوٹیلیٹی سٹورز سے 2237 ملازمین کو نوکری سے نکالا ہے، مالیاتی لحاظ سے کمزور مزید 1 ہزار یوٹیلیٹی سٹورز کو بند کرنا ہے۔
جی ایم یوٹیلیٹی سٹور کا کہنا تھا کہ گزشتہ مالی سال 38 ارب روپے کی سبسڈی ملی تھی، رواں مالی سال کیلئے مختص 60 ارب روپے کی سبسڈی نہیں ملی۔
مشیر نجکاری نے کہا کہ گزشتہ 10 برسوں میں 23 اداروں نے 5500 ارب روپے کا نقصان کیا۔
اجلاس میں فیصلہ کیا گیا کہ رواں ماہ مزید ایک ہزار یوٹیلیٹی سٹورز بند کئے جائیں گے، یوٹیلیٹی سٹورز میں کام کرنے والے ملازمین کو بھی نوکری سے فارغ کر دیا جائے گا۔
مجموعی طور پر 5500 میں سے 1500 یوٹیلیٹی سٹورز سسٹین کئے جائیں گے، مالیاتی لحاظ سے سسٹین کرنے والے یوٹیلیٹی سٹورز کی نجکاری کی جائے گی۔
