کراچی: (دنیا نیوز) پاکستان سٹاک ایکسچینج میں گزشتہ روز سے تاریخی اتار چڑھاؤ کا سلسلہ جاری ہے۔
کاروباری ہفتے کے پانچویں اور آخری روز سٹاک ایکسچینج میں کاروبار کے آغاز پر زبردست تیزی دیکھنے میں آئی، 2000 سے زائد پوائنٹس کے اضافے کے ساتھ پاکستان سٹاک مارکیٹ میں ہنڈرڈ انڈیکس ایک لاکھ 5 ہزار 946 پوائنٹس کی سطح پر پہنچ گیا ہے۔
اتار چڑھاؤ کے دوران سٹاک ایکسچینج میں 1000 سے زائد پوائنٹس کی مندی دیکھی گئی اور ایک بار پھر انڈیکس کم ہو کر ایک لاکھ 2 ہزار 420 پوائنٹس کی سطح پر آ گیا۔
ٹریڈنگ کے دوران اتار چڑھاؤ کا سلسلہ جاری رہا تاہم پہلے سیشن کا اختتام مثبت زون میں ہوا، انڈیکس 173 پوائنٹس بڑھ کر 1 لاکھ 3 ہزار 700 پوائنٹس کی حد پر بند ہوا، کاروبار کے دوران ہنڈرڈ انڈیکس 2400 سے زائد پوائنٹس پلس ہوا۔
پہلے سیشن کے اختتام پر 24 کروڑ سے زائد مالیت شیئرز کا کاروباری حجم 13 ارب روپے سے زائد رہا۔
بعدازاں سٹاک مارکیٹ میں دوسرے سیشن کا آغاز بھی مثبت زون سے ہوا، ہنڈرڈ انڈیکس میں 900 سے زائد پوائنٹس کی تیزی دیکھنے میں آئی جس کے ساتھ 100 انڈیکس 1 لاکھ 3 ہزار پوائنٹس کی حد سے بڑھ کر 1 لاکھ 4 ہزار پوائنٹس کی حد پر ٹریڈ ہونے لگا۔
واضح رہے کہ گزشتہ کاروباری روز کے اختتام پر انڈیکس 6482 پوائنٹس کی کمی کیساتھ ایک لاکھ 3 ہزار 526 پوائنٹس کی سطح پر بند ہوا تھا۔
