کوئٹہ: (دنیا نیوز) صوبۂ بلوچستان کا آئندہ مالی سال 26-2025ء کا بجٹ آج شام 4 بجے پیش کیا جائے گا، صوبائی وزیرِ خزانہ شعیب نوشیروانی صوبائی اسمبلی میں بجٹ پیش کریں گے۔
محکمۂ خزانہ کے ذرائع کے مطابق بجٹ کا مجموعی حجم 1003 ارب روپے سے زائد ہونے کا امکان ہے، آئندہ مالی سال کا بجٹ تقریباً 20 ارب روپے سرپلس ہوگا۔
ذرائع کا کہنا ہے کہ بلوچستان کو آئندہ مالی سال کے دوران وفاق سے 783 ارب روپے ملنے کی توقع ہے، صوبائی محصولات سے 124 ارب کے حصول کا ہدف مقرر کیا گیا ہے۔
غیر ترقیاتی بجٹ 800 ارب، ترقیاتی بجٹ 200 ارب سے زائد ہے، محکمہ تعلیم کے لیے 175 ارب اور صحت کے لیے 110 ارب رکھے جانے کا امکان ہے۔
اسی طرح امن و امان کے لیے 100 ارب اور پنشن کی ادائیگی کے لیے 90 ارب روپے رکھے جانے کی تجویز ہے جبکہ ملازمین کی تنخواہوں میں 10 فیصد اور پنشن میں 7 فیصد اضافہ متوقع ہے۔
آئندہ مالی سال کے بجٹ میں 3000 نئی اسامیوں کی تجویز رکھی گئی ہے، زیادہ اسامیاں تعلیم، صحت اور پولیس کے شعبوں میں رکھی جائیں گی۔
