کراچی: (دنیا نیوز) عالمی مالیاتی فنڈ (آئی ایم ایف) اور پاکستان کے درمیان سٹاف لیول معاہدے کے بعد پاکستان سٹاک مارکیٹ میں مثبت رجحان دیکھنے میں آیا، ہنڈرڈ انڈیکس ایک لاکھ 67 ہزار پوائنٹس کی حد پر بحال ہوگیا ہے۔
کاروباری ہفتے کے تیسرے روز بھی کاروبار کے آغاز پر ہی سٹاک ایکسچینج میں تیزی دیکھنے میں آئی، 2000 سے زائد پوائنٹس کے اضافے کے ساتھ پاکستان سٹاک مارکیٹ میں ہنڈرڈ انڈیکس ایک لاکھ 67 ہزار 561 پوائنٹس کی سطح پر پہنچ گیا۔
تاہم کاروباری روز کے اختتام پر ہنڈرڈ انڈیکس 210 پوائنٹس کے اضافے کیساتھ ایک لاکھ 65 ہزار 686 پوائنٹس کی سطح پر بند ہوا۔
کاروبار کے آغاز میں آٹو موبائل سمبلرز، سیمنٹ، کمرشل بینکس، آئل اینڈ گیس ایکسپلوریشن، آئل مارکیٹنگ کمپنیز (او ایم سیز) اور پاور جنریشن کے شعبوں میں نمایاں خریداری دیکھی گئی، حبکو، ماری، او جی ڈی سی، پی او ایل، پی پی ایل، پی ایس او، ایس ایس جی سی، ایس این جی پی ایل، ایم سی بی، میزان بینک اور یو بی ایل مثبت زون میں ٹریڈ کرتے نظر آئے۔
واضح رہے کہ گزشتہ کاروباری روز کے اختتام پر 7 ہزار 32 پوائنٹس کے اضافے کیساتھ ہنڈرڈ انڈیکس ایک لاکھ 65 ہزار 476 پوائنٹس کی سطح پر بند ہوا تھا۔
