لاہور: (ویب ڈیسک) قومی ٹیم کے ہیڈ کوچ مصباح الحق نے اشارہ دیتے ہوئے کہا ہے کہ ٹی ٹونٹی ورلڈکپ میں سینئر پلیئرز محمد حفیظ اور شعیب ملک کو کھلائیں گے۔
جنوبی افریقا سے ٹی ٹوئنٹی سیریز کے اختتام پر ورچوئل پریس کانفرنس کرتے ہوئےمصباح الحق نے کہا کہ جیت جیت ہو تی ہے، جیت کے لیے ہمیں فائٹ کرنا پڑی لیکن ہم کوئی نمبر 12 کی ٹیم کے ساتھ نہیں کھیل رہے تھے بلکہ جنوبی افریقا کا مقابلہ کر رہے تھے ، اس سے قبل ہم جنوبی افریقا سے کتنی سیریز جیتے ہو ئے ہیں۔
انہوں نے کہا درست ہے کہ جنوبی افریقا کی ٹیم میں بڑے پلئیرز نہیں تھے لیکن ان کے بعد یہ افریقا کے بہترین ٹی ٹوئنٹی پلئیرز ہیں، ان کے خلاف جس طرح فائٹ کرکے دو میچز میں کامیابی حاصل کی گئی ہے اس سے کھلاڑیوں کے اعتماد میں اضافہ ہوگا۔
ہیڈ کوچ کا کہنا تھا کہ میں نے کبھی خود کو غیر محفوظ محسوس نہیں کیا، نتائج ہمارے کنٹرول میں نہیں ہیں اور نہ ہمارے کنٹرول میں یہ ہے کہ بورڈ نے ہمیں کب تک رکھنا ہے، ہماری توجہ میچز پر ہوتی ہے اور اہم بات یہ ہے کہ ہم سیریز جیتے ہیں۔
مصباح نے مزید کہا کہ ابھی بہت کچھ کرنے کی ضرورت ہے، بیٹسمینوں کو اسپن بولنگ کھیلنے میں مشکل کا سامنا ہے، ورلڈکپ بھارت میں کھیلا جانا ہے، سپن کی0خلاف بیٹنگ اچھی کرنا ہو گی اور اس پر کام کریں گے۔
ان کا کہنا تھا کہ ورلڈکپ ابھی سر پر نہیں ہے، اس میں ابھی وقت ہے اور اس دوران بہت میچز کھیلنے ہیں، ٹیم میں شاداب خان ، عماد وسیم اور محمد حفیظ جیسے کھلاڑی نہیں تھے، ان کی واپسی ہونا ہے، اس کے علاوہ ابھی پی ایس ایل ہو رہی ہے، پی ایس ایل کھیل کر کھلاڑیوں کواپنی فارم سامنے لانے کا موقع ملے گا، اس طرح ایک اچھا پول بن جائے گا اور ہمیں کمبی نیشن بنانے میں آسانی ہو گی۔
مصباح الحق نے کہا کہ صرف افتخار احمد کو ہی نہیں چانسز دیے گئے اس کے علاوہ بھی کئی کھلاڑیوں کو چانس ملے، اب ان کے پاس پی ایس ایل کا موقع ہے، کھیلیں ، پرفارم کریں اور سلیکشن کی دوڑ میں شامل رہیں۔
اپنی بات کو جاری رکھتے ہوئے انہوں نے کہا کہ آئندہ ٹی ٹونٹی ورلڈکپ میں سینئر آل راؤنڈرز محمد حفیظ اور شعیب ملک کو کھلایا جائے گا، دونوں سینئر کھلاڑی، عماد وسیم جنوبی افریقا کیخلاف سیریز کے سکواڈ میں موجود نہیں تھے، تاہم یہ ہمارے فیوچر پلان میں شامل ہیں۔ ہم سینئر اور جونیئر پلیئرز کا کمبی نیشن بنائے ہوئے ہیں۔
