ہیملٹن: (ویب ڈیسک) سری لنکن آف سپنر مہیش ٹھیکشانا نے نیوزی لینڈ کے خلاف دوسرے ون ڈے میں ہیٹ ٹرک کر کے سال 2025 میں پہلی ہیٹ ٹرک کرنے والے باؤلر کا منفرد اعزاز حاصل کر لیا۔
سری لنکن کرکٹ ٹیم ان دنوں نیوزی لینڈ کے دورے پر ہے جہاں بدھ کو دونوں ٹیموں کے درمیان 3 میچز کی سیریز کا دوسرا ون ڈے کھیلا گیا۔
بارش سے متاثرہ میچ کو 37 اوور فی اننگز تک محدود کیا گیا جس میں نیوزی لینڈ نے سری لنکا کی دعوت پر پہلے بیٹنگ کرتے ہوئے 9 وکٹوں پر 255 رنز بنائے۔
سری لنکن آف سپنر مہیش ٹھیکشانا نے نیوزی لینڈ کے خلاف دوسرے ون ڈے میں شاندار باؤلنگ کرتے ہوئے 4 وکٹیں حاصل کیں جس میں ایک ہیٹ ٹرک بھی شامل تھی۔
ٹھیکشانا نے 35ویں اوور کی آخری 2گیندوں پر نیوزی لینڈ کے کپتان مچل سینٹنر اور ناتھن سمتھ کو آؤٹ کیا اور پھر 37 ویں اوور کی پہلی گیند پر میٹ ہنری کو پویلین واپس بھیجا۔
ٹھیکشانا نیوزی لینڈ کی سرزمین پر ہیٹ ٹرک کرنے والے پہلے سری لنکن باؤلر بھی بن گئے جبکہ وہ ون ڈے کرکٹ میں ہیٹ ٹرک کرنے والے سری لنکا کے ساتویں باؤلر ہیں۔
