اسلام آباد:(دنیا نیوز) آئی سی سی چیمپئنز ٹرافی 2025 کے لیے وفاقی کابینہ نے فل پروف سکیورٹی کی منظوری دے دی۔
کابینہ ذرائع کے مطابق وفاقی کابینہ نے چیمپئنز ٹرافی کیلیے آئین کے آرٹیکل 245 کے تحت فوج تعینات کرنے کی منظوری دی، چیمپئنز ٹرافی کے میچز کیلیے پاک فوج، سول آرمڈ فورسز، پولیس اور قانون نافذ کرنے والے ادارے مشترکہ سکیورٹی کے فرائض سر انجام دیں گے۔
دوسری جانب پی سی بی حکام نے بتایا کہ چیمپئنز ٹرافی کیلئے 12 فروری سے ٹیمیں پاکستان پہنچ رہی ہیں، صوبہ پنجاب اور سندھ کی درخواست پر سکیورٹی کی منظوری لی گئی۔
علاوہ ازیں وزارت داخلہ نے ٹیموں کی فل پروف سکیورٹی کیلئے اداروں اور صوبائی ہوم ڈیپارٹمنٹس کو ہدایات جاری کر دیں، چیمپئنز ٹرافی کیلئے آنے والی ٹیموں کو پریزینٹیشن لیول کی سکیورٹی فراہم کی جائے گی۔
