لاہور: (دنیا نیوز) لاہور ہائی کورٹ نے چیمپئنز ٹرافی 2025ء کے میچز کے دوران بہترین ٹریفک انتظامات کی تعریف کی ہے۔
لاہور ہائی کورٹ میں سموگ اور ماحولیاتی آلودگی کے تدارک کے لیے درخواستوں پر سماعت ہوئی، عدالت نے آئندہ سماعت پر عدالتی احکامات پر عمل درآمد کی رپورٹ طلب کر لی۔
عدالتِ عالیہ نے ٹریفک وارڈنز کو ہیلتھ الاؤنس فراہمی کا عمل تیز کرنے کا حکم بھی دیا ہے، لاہور ہائی کورٹ نے ہدایت کی ہے کہ وارڈنز کا سروس اسٹرکچر جلد بنایا جائے۔
عدالت نے شہر کے 18 مقامات پر ٹریفک جام ختم کرنے کے پلان اور واسا سے گندے نالے انڈر گراؤنڈ کرنے کے حکم پر بھی رپورٹ مانگ لی، عدالتِ عالیہ نے پبلک پرائیویٹ پارٹنر شپ کے تحت پارکنگ سٹینڈز بنانے کی بھی ہدایت کر دی۔
دورانِ سماعت پی ایچ اے نے لاہور میں ساڑھے 3 لاکھ درخت لگانے کی رپورٹ عدالت میں پیش کرتے ہوئے کہا کہ لاہور میں مزید ساڑھے 3 لاکھ درخت بھی لگائے جائیں گے۔
