لاہور: (ویب ڈیسک) انگلینڈ کے فاسٹ باؤلر جوفرا آرچر نے اپنے ہم وطن سابق باؤلر جیمز اینڈرسن کا ون ڈے کرکٹ میں 21 سال پرانا ریکارڈ توڑ دیا۔
دائیں ہاتھ کے فاسٹ باؤلر جوفرا آرچر نے بدھ کے روز قذافی سٹیڈیم میں چیمپئنز ٹرافی کے میچ میں افغانستان کے خلاف شاندار کارکردگی کا مظاہرہ کرتے ہوئے نیا ریکارڈ قائم کیا۔
آرچر نے افغانستان کی اننگز کے آغاز میں 2 اہم وکٹیں حاصل کیں اور اس کے ساتھ ہی وہ انگلینڈ کے عظیم فاسٹ باؤلر جیمز اینڈرسن کا ریکارڈ توڑ کر ون ڈے کرکٹ میں 50 وکٹیں لینے والے انگلینڈ کے تیز ترین باؤلر بن گئے۔
اس سے قبل جیمز اینڈرسن نے 2004 میں ویسٹ انڈیز کے خلاف 31 میچوں میں یہ سنگ میل عبور کیا تھا لیکن 29 سالہ آرچر نے 30 میچوں میں 50 وکٹیں حاصل کر کے یہ کارنامہ انجام دیا۔
ون ڈے کرکٹ میں سب سے تیز 50 وکٹیں لینے کا عالمی ریکارڈ سابق سری لنکن سپنر اجنتھا مینڈس کے پاس ہے جنہوں نے 2009 میں صرف 19 میچوں میں یہ کارنامہ انجام دیا تھا۔
واضح رہے کہ بدھ کو افغانستان نے گروپ بی کے اہم میچ میں انگلینڈ کو 8 رنز سے شکست دے کر اسے چیمپئنز ٹرافی سے باہر کر دیا ہے۔
