کراچی: (دنیا نیوز) آئی سی سی چیمپئنز ٹرافی 2025 میں گروپ بی کے آخری میچ میں انگلینڈ نے جنوبی افریقا کو جیت کیلئے180 رنزکا ہدف دے دیا۔
دونوں ٹیموں کے درمیان میچ کراچی کے نیشنل بینک سٹیڈیم میں کھیلا جا رہا ہے جہاں جنوبی افریقا کو ایڈن مارکرم لیڈ کر رہے ہیں جبکہ انگلینڈ کی کمان جوز بٹلر کے ہاتھوں میں ہے۔
قبل ازیں انگلش کپتان جوز بٹلر نے ٹاس جیت کر پہلے بیٹنگ کا فیصلہ کیا جو اچھا ثابت نہ ہو سکا، انگلینڈ کا آغاز ہی مایوسی کن رہا، اوپنر فل سالٹ 8، بین ڈکٹ 24 اور جیمی سمتھ صفر پر پویلین روانہ ہو گئے، چوتھی وکٹ کی شراکت میں جو روٹ اور ہیری بروک نے 60 رنز کی پارنٹر شپ قائم کی مگر بعدازاں ہیری بروک بھی 19 رنز بنا کر پویلین لوٹ گئے۔
تجربہ کار بلے باز جو روٹ نے جنوبی افریقی باؤلرز کے سامنے کچھ مزاحمت دکھائی مگر 39 کے انفرادی سکور پر ان کی بھی ہمت جواب دے گئی اور وہ ملڈر کی گیند پر کلین بولڈ ہو گئے جبکہ ان کے بعد آنے والے بلے باز لیام لیونگسٹون بھی کپتان جوز بٹلر کا زیادہ دیر تک ساتھ نہ دے سکے اور 9 رنز بنا کر مہاراج کی گیند پر کلاسن کے ہاتھوں سٹمپ آؤٹ ہو گئے، یوں انگلینڈ کی پوری ٹیم38.2 اوورز میں 179رنز بنا کر آؤٹ ہو گئی۔
جنوبی افریقا کی جانب سے مارکو جینسن نے 3، ملڈر 3، مہاراج 2، لنگی نگیڈی، کاگیسو ربادا نے ایک، ایک وکٹ حاصل کی۔
قبل ازیں انگلش ٹیم کے کپتان جوز بٹلر نے ٹاس جیت کر پہلے بیٹنگ کرنے کا فیصلہ کرتے ہوئے کہا کہ آج بطور کپتان کیریئر کا آخری میچ ہے کوشش ہو گی فتح حاصل کریں۔
اس موقع پر جنوبی افریقا کے کپتان ایڈن مارکرم نے کہا کہ ہدف کا تعاقب کرنا چاہتے تھے، میچ میں فتح کیساتھ سیمی فائنل میں پہنچنے پر نگاہیں مرکوز ہیں۔
انگلش سکواڈ
انگلش سکواڈ کپتان جوز بٹلر، فل سالٹ، بین ڈکٹ، جیمی سمتھ، جو روٹ، ہیری بروک، لیام لیونگسٹون، جیمی اوورٹن، جوفرا آرچر، عادل رشید اور ثاقب محمود پر مشتمل ہے۔
جنوبی افریقی ٹیم
جنوبی افریقی ٹیم میں کپتان ایڈن مارکرم، ریان رکیلٹن، ٹرسٹن سٹبس، رسی وین ڈیر ڈوسن، ہینرک کلاسن، ڈیوڈ ملر، ویان مولڈر، مارکو جینسن، کیشو مہاراج، کاگیسو ربادا اور لنگی نگیڈی شامل ہیں۔
