ممبئی: (ویب ڈیسک) بھارتی کرکٹ بورڈ نے انڈین پریمیئر لیگ (آئی پی ایل) کے لیے گیند پر تھوک لگانے کی پابندی ختم کردی۔
کورونا کے دوران انٹرنیشنل کرکٹ کونسل نے یہ پابندی لگائی تھی جس کے بعد 5 برس سے انٹرنیشنل کرکٹ میں فاسٹ باؤلرز بال پسینے سے چمکاتے ہیں۔
دوسری جانب قومی کرکٹ ٹیم کے فاسٹ باؤلرز نے گیند چمکانے کے لیے تھوک پر پابندی ختم ہونے کو خوش آئند قرار دیا ہے۔
فاسٹ باؤلر نسیم شاہ نے کہا ہے کہ تھوک سے گیند زیادہ جلدی چمکتی ہے تاہم اس کے باوجود باؤلنگ تو اچھی ہی کرنی پڑے گی، فاسٹ باؤلر وسیم جونیئر نے کہا ہے کہ گیند پر تھوک کا استعمال ہمارے لیے مددگار ثابت ہو گا، باؤلرز کو ریورس سوئنگ کرنے میں مدد ملے گی۔
فہیم اشرف کا کہنا ہے کہ اب گیند کو تھوک سے چمکانے کی اجازت ملتی ہے تو پہلے جیسی باؤلنگ ہو گی، عاکف جاوید نے کہا ہے کہ گیند کے دونوں طرف پسینے لگانے سے ریورس ہونا کم ہو گیا تھا۔
