لاہور: (ویب ڈیسک) پاکستانی بیٹر حسن نواز نے بابر اعظم کے ٹی 20 انٹرنیشنل میں تیز ترین سنچری بنانے والے پاکستانی کرکٹر ہونے کا ریکارڈ توڑ دیا۔
22 سالہ حسن نواز نے آکلینڈ میں کھیلے گئے تیسرے ٹی 20 میچ میں 44 گیندوں پر سنچری بنائی، ان کی اننگز میں 10 چوکے اور 7 چھکے شامل تھے۔
حسن نواز نے 105 رنز کی ناقابل شکست اننگز کھیلی اور وہ شاندار بیٹنگ کارکردگی پر پلیئر آف دی میچ قرار پائے، یہاں یہ بات بھی قابل ذکر ہے کہ یہ میچ حسن نواز کے کیریئر کا محض تیسرا ٹی 20 انٹرنیشنل تھا۔
واضح رہے کہ اس سے قبل بابراعظم نے 2021 میں 49 گیندوں پر جنوبی افریقا کے خلاف سنچری سکورکی تھی۔
خیال رہے کہ تیسرے ٹی 20 میں پاکستان نے کیویز کو 9 وکٹوں سے شکست دی، 5 میچز کی سیریز میں دو میچز نیوزی لینڈ جب کہ ایک پاکستان کے نام رہا۔
