ڈھاکہ: (دنیا نیوز) بنگلا دیش کرکٹ بورڈ (بی سی بی) کے چیف میڈیکل آفیسر دیباشیش چودھری نے تمیم اقبال کی صحت سے متعلق تازہ معلومات شیئر کردیں۔
بنگلا دیش کے لیجنڈری کرکٹر تمیم اقبال کو پیر کے روز ڈھاکہ پریمیئر لیگ کے میچ کے دوران دل کا دورہ پڑا تھا، تمیم اقبال کو فیلڈنگ کرتے ہوئے سینے میں تکلیف محسوس ہوئی جس کے بعد فوری طور پر اُنہیں ہسپتال منتقل کر دیا گیا۔
چیف میڈیکل آفیسر کے مطابق کرکٹر کی ایک شریان میں رکاوٹ پائی گئی جسے دور کرنے کے لیے اسٹنٹ ڈالا گیا، تاہم دیگر شریانیں صحت مند ہیں اور ان کی مجموعی حالت میں تیزی سے بہتری آرہی ہے۔
انہوں نے مزید کہا کہ تمیم اقبال کی طبیعت بہتر ہو رہی ہے اور آئندہ 24 گھنٹوں میں مزید بہتری کی توقع ہے، ہسپتال کی رپورٹ کے مطابق ان کے دیگر اعضا بالکل ٹھیک ہیں اور ڈاکٹرز ان کی جلد صحت یابی کے لیے پرامید ہیں۔
دوسری جانب کے پی جے سپیشلائزڈ ہسپتال کے میڈیا ڈائریکٹر ڈاکٹر راجیب حسن نے بتایا کہ تمیم اقبال کی فوری طور پر اینجیوگرام، اینجیوپلاسٹی اور اسٹنٹنگ کی گئی، جس کے بعد ان کی بند شریان کو کھول دیا گیا ہے اور اب ان کی حالت میں مسلسل بہتری آ رہی ہے۔
