راولپنڈی: (دنیا نیوز) قومی ٹی 20 ٹیم کے کپتان سلمان علی آغا نے کہا ہے کہ ٹی 20 ورلڈ کپ جیت کر 2026 یادگار بنائیں گے۔
سری لنکا کو سہ ملکی ٹی 20 سیریز کے فائنل میں شکست دینے کے بعد میڈیا سے گفتگو کرتے ہوئے کپتان سلمان علی آغا کا کہنا تھا کہ یہ ہمارے لئے بہترین سیریز تھی، کم بیک کے بعد سے محمد نواز الگ ہی لیول کا پرفارم کررہے ہیں۔
انہوں نے کہا کہ ہم دو ماہ سے بہترین کرکٹ کھیل رہے ہیں، امید ہے کارکردگی کا تسلسل برقرار رہے گا، شاداب خان کو بھی ٹیم میں شامل کیا جا سکتا ہے۔
ٹی 20 ٹیم کے کپتان کا کہنا تھا کہ ٹی20 ورلڈ کپ 2026ء سے پہلے 15 لڑکوں کو تیار کرنا چاہتے تھے، ہماری تیاری مکمل ہوگئی، ہمارا ہر کھلاڑی پرفارم کر رہا ہے، ہم ورلڈ کپ کے لئے اب پوری طرح تیار ہیں۔
ٹرائی سیریز کے بہترین کھلاڑی قرار پانے والے محمد نواز نے کہا کہ جب ٹیم کو ضرورت ہو تو اس وقت پرفارم کرنا اہم ہوتا ہے، خوشی ہے میری کارکردگی ٹیم کے کام آئی، کوشش کرتا ہوں میچ کی صورت حال کے مطابق بیٹنگ اور بولنگ کروں۔
فائنل میں ہم نے سپنر کیخلاف اچھی بیٹنگ نہیں کی، سری لنکن کپتان
ٹرائی نیشن سیریز کے فائنل میں پاکستان سے شکست کے بعد گفتگو کرتے ہوئے سری لنکن کپتان داسن شناکا نے کہا کہ فائنل میں ہم نے سپنر کے خلاف اچھی بیٹنگ نہیں کی، ہم نے اننگز کا آغاز اچھا کیا تھا۔
ان کا کہنا تھا کہ کامل مشارا نے زبردست اننگز کھیلی، ہم نے سپنرز کے خلاف اچھی بیٹنگ نہیں کی، ہمیں اس سیریز سے ٹی20 ورلڈ کپ کی تیاریوں کا موقع ملا ہے۔
واضح رہے کہ ٹی 20 ٹرائی سیریز کے فائنل میں پاکستان نے سری لنکا کو 6 وکٹوں سے ہراکر سیریز اپنے نام کی۔
