راولپنڈی :(دنیا نیوز) ٹی 20 ٹرائی سیریزمیں محمد نواز کو مین آف دی میچ اور پلیئر آف دی سیریز قرار دیا گیا۔
محمد نواز نے سری لنکا کے خلاف فائنل میچ جیتنے میں 4 اوورز میں 17 رنز دے کر 3 وکٹیں حاصل کیں اور ٹیم کی جیت میں اہم کردار ادا کیا، انہوں نے سیریز میں مجموعی طور پر 10 وکٹیں حاصل کیں۔
محمد نواز نے فائنل کے بعد گفتگو میں کہا کہ جب ٹیم کو ضرورت ہو تو اس وقت کارکردگی دکھانا سب سے اہم ہوتا ہے، وہ کوچز کے ساتھ مکمل منصوبہ بندی کرتے ہیں اور بطور سپنر سادگی کے ساتھ گیند بازی کو ترجیح دیتے ہیں۔
اُن کا کہنا تھا کہ فنگر سپنر ہونے کی وجہ سے زیادہ آپشنز نہیں ہوتے، اس لیے وہ میچ کی صورتِ حال کو پڑھ کر اِسی کے مطابق بولنگ کرتے ہیں۔
بیٹنگ کے حوالے سے محمد نواز نے مزید کہا کہ وہ ہر موقع پر یہ دیکھتے ہیں کہ ٹیم کو پارٹنرشپ درکار ہے یا جارحانہ کھیل کی ضرورت ہے اور اِسی حساب سے بیٹنگ کرتے ہیں۔



