اسلام آباد: (دنیا نیوز) تھانہ کراچی کمپنی کی حدود سے اغواء ہونے والے دو مغوی افراد کو اسلام آباد پولیس نے کامیاب کارروائی کے بعد بحفاظت بازیاب کرا لیا۔
پولیس نے اغواء اور سٹریٹ کرائم کی متعدد وارداتوں میں ملوث 8 ملزمان کو بھی گرفتار کر لیا۔
ترجمان پولیس کے مطابق مغویوں کی بازیابی کے لیے جدید ٹیکنالوجی، سیف سٹی کیمرہ جات اور انسانی ذرائع کا مؤثر استعمال کیا گیا، خفیہ اطلاع پر تھانہ کرپا کی حدود میں ایک ڈیرے پر چھاپہ مارا گیا جہاں مغویوں کو رکھا گیا تھا۔
چھاپے کے دوران ملزمان نے پولیس ریڈنگ پارٹی پر فائرنگ کر دی تاہم پولیس اہلکاروں نے پیشہ ورانہ مہارت اور بلٹ پروف جیکٹس کی بدولت خود کو محفوظ رکھا۔
پولیس کی جوابی کارروائی کے دوران ایک ملزم فائرنگ کی زد میں آ کر زخمی ہو گیا جسے ابتدائی طبی امداد کے بعد ہسپتال منتقل کر دیا گیا ہے۔
پولیس نے جائے وقوعہ سے وارداتوں میں استعمال ہونے والا اسلحہ اور ایمونیشن بھی برآمد کر لیا، گرفتار ملزمان سے تفتیش جاری ہے اور مزید سنسنی خیز انکشافات کی توقع ہے۔
ڈی آئی جی اسلام آباد محمد جواد طارق نے اس کامیاب کارروائی پر ٹیم کو شاباش دیتے ہوئے نقد انعامات کا اعلان کیا۔
انہوں نے کہا کہ اسلام آباد پولیس ایک محنتی، پروفیشنل اور جدید وسائل سے لیس فورس ہے جو عوام کے تحفظ کے لیے ہر ممکن اقدامات جاری رکھے گی، عوام سے اپیل ہے کہ وہ قانون نافذ کرنے والے اداروں سے مکمل تعاون کریں تاکہ شہر کو جرائم سے پاک رکھا جا سکے۔
