خیبر پختونخوا: (دنیا نیوز) اینٹی کرپشن خیبر پختونخوا نے ضلع مہمند میں کارروائی کرتے ہوئے سسٹنٹ ڈائریکٹر لوکل گورنمنٹ کے دفتر سے وابستہ دو ملازمین کو رشوت لیتے ہوئے رنگے ہاتھوں گرفتار کر لیا۔
اینٹی کرپشن کے مطابق گرفتار ملزمان میں سٹینوگرافر بادشاہ گل اور جونیئر کلرک رحمت سید شامل ہیں جنہیں ایک لاکھ روپے رشوت وصول کرتے ہوئے حراست میں لیا گیا، کارروائی کے دوران ملزمان کے قبضے سے رشوت کی رقم بھی برآمد کر لی گئی ہے۔
محکمے کا کہنا ہے کہ سسٹنٹ ڈائریکٹر لوکل گورنمنٹ مہمند کے دفتر کے عملے نے مجموعی طور پر تین لاکھ روپے رشوت طلب کی تھی جس پر اینٹی کرپشن نے کارروائی عمل میں لائی۔
اینٹی کرپشن حکام کے مطابق گرفتار ملزمان کے خلاف ایف آئی آر درج کر لی گئی ہے جبکہ مقدمے میں ملوث دیگر افراد کی گرفتاری کے لیے بھی کارروائی شروع کر دی گئی ہے۔
