کراچی: اینٹی نارکوٹکس فورس (اے این ایف) نے ملک کے مختلف شہروں میں 12 کامیاب کارروائیاں کرتے ہوئے 90 کلو 730 گرام منشیات برآمد کر لی جبکہ 2 خواتین سمیت 14 ملزمان کو گرفتار کر لیا گیا۔
ترجمان اے این ایف کے مطابق کارروائیاں ڈی جی خان، راولپنڈی، شیخوپورہ، لاہور، جامشورو، اسلام آباد، قصور اور اٹک میں کی گئیں، کارروائیوں کے دوران 85 کلو 980 گرام چرس، 3 کلوگرام ہیروئن برآمد کی گئی۔
ترجمان کے مطابق 1.5 کلوگرام آئس، 28 گرام ویڈ، ایک ڈرون اور ریموٹ کنٹرول بھی قبضے میں لیا گیا، گرفتار ملزمان میں سے ایک نے تعلیمی اداروں کے طلباء کو منشیات فروخت کرنے کا اعتراف بھی کیا ہے۔
اے این ایف کا کہنا ہے کہ تمام کارروائیوں کے مقدمات انسدادِ منشیات ایکٹ 1997 کے تحت درج کر لیے گئے ہیں اور مزید تفتیش جاری ہے۔
