پولیس کے اعلیٰ حکام کے مطابق واقعہ تھانہ پاکستان بازار کی حدود میں لیاقت چوک کے قریب پیش آیا جہاں پولیس اور ڈاکوؤں کے درمیان دوطرفہ فائرنگ کا تبادلہ ہوا، فائرنگ کے دوران پولیس اہلکار حسن علی جام شہادت نوش کر گئے۔

ایس ایس پی ویسٹ نے بتایا کہ جوابی کارروائی میں دونوں مسلح ملزمان ہلاک ہوگئے، پولیس نے ملزمان کے قبضے سے دو پستول، بھاری مقدار میں ایمونیشن اور واردات میں استعمال ہونے والی موٹرسائیکل برآمد کر لی۔

پولیس حکام کے مطابق واقعہ کے بعد جائے وقوعہ سے شواہد اکٹھے کر لئے گئے ہیں جبکہ ہلاک ملزمان کی شناخت، ان کے مجرمانہ ریکارڈ اور دیگر پہلوؤں سے متعلق تحقیقات جاری ہیں۔

آئی جی سندھ جاوید عالم اوڈھو نے ڈی آئی جی ویسٹ سے واقعے کی تفصیلی رپورٹ طلب کرلی، آئی جی نے شفاف تحقیقات، پولیس کارروائی کا جامع جائزہ اور فوری رپورٹ پیش کرنے کی ہدایت کردی۔

آئی جی سندھ جاوید عالم اوڈھو نے شہید پولیس اہلکار حسن کی بہادری، فرض شناسی اور جرات کو زبردست خراجِ عقیدت، اہل خانہ سے دلی تعزیت اور ہمدردی کا اظہار بھی کیا۔