شوبز میں قدم رکھنے پر رشتہ داروں نے شادی نہ ہونے کے طعنے دیئے:سعدیہ امام

Published On 29 November,2023 11:56 am

لاہور: (ویب ڈیسک) مقبول پاکستانی اداکارہ و میزبان سعدیہ امام نے کہا ہے کہ جب میں نے شوبز انڈسٹری میں قدم رکھا تو رشتہ داروں نے شادی نہ ہونے کے طعنے دئیے۔

حال ہی میں اداکارہ سعدیہ امام نے نجی ٹی وی شو میں شرکت کی جس میں انہوں اپنے کیریئر اور شادی سمیت مختلف موضوعات پر کھل کر بات کی۔

شادی سے متعلق بات کرتے ہوئے سعدیہ امام کا کہنا تھا کہ شوبز انڈسٹری میں آنے کے بعد میرے اپنے ہی رشتہ داروں کی جانب سے سب سے پہلا طعنہ یہ سننے کو ملا کہ میری شادی کبھی نہیں ہوگی، اگر ہو گی بھی تو دو بچوں کے باپ سے ہوگی۔

انہوں نے بتایا کہ شادی سے قبل میں اور میرے والدین روزانہ ایسی باتیں سنتے تھے، میں انہیں روزانہ اس بُرے وقت سے گزرتا دیکھتی تھی، انہی لوگوں کی باتوں سے میں مضبوط بنی اور سب کو غلط ثابت کیا۔

اداکارہ کا کہنا تھا کہ میں نے اپنے والدین کو کہا کہ آپ جس سے کہیں گے میں شادی کرلوں گی لیکن پہلے مجھے اپنے کام پورے کرنے دیں، کیونکہ اب میں اس کیچڑ میں کود گئی ہوں اور اپنے کام مکمل کیے بغیر پیچھے نہیں ہٹوں گی۔

سعدیہ نے مزید کہا کہ ماشااللہ مجھے غیر شادی شدہ نوجوان شوہر بھی ملا اور اللہ نے ہمیں اولاد سے بھی نوازا، جب عدنان کا رشتہ آیا تو تب بھی لوگوں نے کہا کہ ذرا چیک کرو کہ اس کی دو یا تین بیویاں بھی ہوں گی۔ 

Advertisement