لاہور: (ویب ڈیسک) پاکستان کی نامور اداکارہ اور ماڈل ایمان علی کی والدہ اور سینئر اداکارہ حمیرا عابد علی انتقال کر گئیں۔
اداکارہ کی بہن گلوکارہ رحما علی نے سوشل میڈیا پلیٹ فارم انسٹاگرام پر ایک پوسٹ کے ذریعے اپنی والدہ حمیرا عابد علی کے انتقال کی خبر دی اور کہا کہ مرحومہ کی نمازِ جنازہ ڈی ایچ اے فیز 5، سوئی گیس سوسائٹی کے قریب بعداز نماز مغرب ادا کی جائے گی۔
حمیرا عابد علی نے پی ٹی وی کے سنہرے دور میں اپنے فنی سفر کا آغاز کیا، وہ ایک باوقار اور باصلاحیت اداکارہ تھیں جنہوں نے اپنی فنکارانہ صلاحیتوں سے ناظرین کے دل جیتے، وہ پی ٹی وی کے کئی یادگار ڈراموں کا حصہ رہیں۔
اسی دوران ان کی ملاقات معروف اداکار عابد علی سے ہوئی اور دونوں نے شادی کر لی، شادی کے بعد کچھ عرصہ حمیرا نے شوبز سے وقفہ لے کر اپنی 3 بیٹیوں کی پرورش پر توجہ دی، بعد ازاں عابد علی نے رابعہ نعمان سے دوسری شادی کی، مگر حمیرا نے مضبوطی سے زندگی کا سامنا کیا اور دوبارہ شوبز میں واپسی کی۔
حمیرا عابد علی کی بیٹیاں بھی ان کے نقشِ قدم پر چلیں، ایمان علی نے ناصرف ماڈلنگ بلکہ فلموں میں بھی اپنی صلاحیتوں کا لوہا منوایا، وہ آج پاکستان کی سپر سٹارز میں شمار کی جاتی ہیں۔
دوسری طرف رحمہ علی نے گلوکاری کے میدان میں اپنا نام بنایا اور ان کے گائے گئے نغمے لوگوں کے دلوں میں بسے ہوئے ہیں۔
اداکارہ کے انتقال پر شوبز انڈسٹری کی بڑی شخصیات، مداحوں اور سوشل میڈیا صارفین کی جانب سے گہرے رنج و غم کا اظہار کیا جا رہا ہے، بہت سے لوگوں نے انہیں ایک باوقار فنکارہ، باہمت ماں اور نرم دل انسان قرار دیا۔
