ممبئی: (ویب ڈیسک) بھارتی اداکارہ راکھی ساونت نے فلم ڈائریکٹر اور کوریو گرافر فرح خان سے یہ اقرار کروا لیا کہ وہ اتنی ’غریب‘ نہیں جتنی اپنے باورچی دلیپ کے ساتھ مذاق میں خود کو ظاہر کرتی ہیں۔
بھارتی اداکارہ راکھی ساونت نئے ولاگ کے سلسلے میں بالی وڈ کی معروف فلم ڈائریکٹر اور کوریو گرافر فرح خان کے گھر پہنچیں، جیسے ہی راکھی ساونت فرح خان کی بلڈنگ میں داخل ہوئیں تو انہوں نے چوکیدار سے فلیٹ کی قیمت کے بارے میں پوچھا، چوکیدار نے بتایا کہ اس کی قیمت 15 کروڑ ہے، تاہم جب راکھی نے فرح سے یہی سوال کیا تو وہ فوراً بولیں، بھئی، میرا گھر 15 کروڑ کا نہیں ہے، تو مارکیٹ نیچے کیوں کر رہی ہے؟
فرح خان نے مزید کہا کہ ہماری بلڈنگ میں تو چوکیدار کی کھولی ہی 15 کروڑ کی ہے! بعد میں، فرح خان نے فخر سے اپنے گھر کے بارے میں بتایا کہ میرے پاس 2 مزید فلور اور ایک سوئمنگ پول بھی ہے، اس پر راکھی نے فوراً کہا کہ میں سوچتی تھی بالی ووڈ مجھے پیسے کیوں نہیں دیتا، اب سمجھ آیا، سارے پیسے تو فرح لے گئی۔
راکھی کی باتوں پر فرح نے ہنستے ہوئے وضاحت دی اور کہا کہ کیسی باتیں کر رہی ہو، میں تو سب کچھ فری میں کرتی ہوں، اسی دوران جب دونوں کچن کی طرف گئیں تو راکھی نے بلڈنگ کی لفٹ کی شکایت کی کہ یہ کچھ خاص نہیں ہے، اس پر فرح نے فوراً کہا کہ گلاس والی پرائیویٹ لفٹ سیدھی میرے گھر آتی ہے، جب وہ راکھی ساونت کو مذکورہ لفٹ دکھانے لے گئیں تو اسے ’’جیمز بانڈ‘‘ کی لفٹ قرار دیا۔
فرح خان نے مزید بتایا کہ وہ 7 کمروں والے اپارٹمنٹ میں رہتی ہیں جس پر راکھی نے مذاق میں کہا کہ وہ فرح کو 6 کمروں والا اپارٹمنٹ تحفے میں دے گی، اس سے قبل بھی فرح خان نے اپنے مشہور ککنگ ولاگ کیلئے کئی سیلیبریٹیز کو اپنے گھر مدعو کیا ہے اور خود بھی مختلف ستاروں کے گھروں میں جا چکی ہیں، راکھی سے قبل ان کے یوٹیوب چینل پر تازہ ترین مہمان جیکی شروف تھے
