خلاصہ
- لاہور: (ویب ڈیسک) پاکستانی معروف اداکارہ یشما گل کا دوستوں کے ہمراہ ڈانس ویڈیو سوشل میڈیا پر وائرل ہوگئی جس پر صارفین نے ملا جلا ردِعمل دیا۔
یشما گل پاکستان کی معروف اداکارہ ہیں جن کے انسٹاگرام پر 1.6 ملین سےزائد فالورز ہیں، انہوں نے ’’اب دیکھ خدا کیا کرتا ہے، کس دن میرا ویاہ ہو گا، صدقے تمہارے، بے باک، تیرے عشق کے نام، پھانس اور حق مہر‘‘ جیسے کامیاب ڈراموں میں اداکاری کی ہے۔
حال ہی میں وہ اپنی قریبی دوست گلالئی اور علی کی میوزیکل نائٹ میں شریک ہوئیں جہاں انہوں نے زرمینے اور اداکارہ زویا ناصر سمیت دیگر دوستوں کے ساتھ پرفارم کیا۔
یشما گل اور زرمینے نے مقبول پاکستانی گانے گال سن پر ڈانس کیا، اس کے علاوہ اداکارہ نے گرو رندھاوا کے گانے سیرا پر بھی پرفارمنس دی۔
سوشل میڈیا پر وائرل ہونے والی ان کے ڈانس کی ویڈیوز نے ایک نئی بحث چھیڑ دی ، کچھ مداحوں نے یشما گل کے ڈانس اور اینرجی کو سراہا جبکہ وہیں کچھ صارفین نے ان کے ڈانس پر تنقید بھی کی۔
ایک صارف نے لکھا کہ ’’انہیں نہ ڈانس آتا ہے اور نہ شرم‘‘، ایک اور صارف کا کہنا تھا کہ ’’پتا کرو یہ مخلوق کس چڑیا گھر سے بھاگی ہے، جبکہ ایک صارف نے لکھا کہ ’’ یہ کیسے مردانہ مووز ہیں‘‘۔
کئی مداحوں نے اداکارہ کی حمایت کرتے ہوئے کہا کہ اس ڈانس کو تفریح کے طور پر ہی دیکھا جانا چاہیے۔
