پشاور:(ویب ڈیسک) محکمہ صحت خیبرپختونخوا کی میڈیکل ٹیم نے منکی پاکس سے متاثرہ مریض کے گھر اور علاقے کا دورہ کیا ہے اور مریض کے ہسپتال سے فرار ہونے کی خبروں کی تردید کی ہے۔
محکمہ صحت کی ٹیم کا کہنا ہے کہ مردان کے علاقے منگا میں موجود منکی پاکس کے مریض کی حالت بہتر ہے، متاثرہ مریض کو ان کے گھر میں آئسولیٹ کیا ہوا ہے۔
قبل ازیں، میڈیا پر خبریں دیکھنے کو ملی تھیں کہ مردان میں موجود منکی پاکس کا مریض ہسپتال سے فرار ہوگیا ہے۔
تاہم ڈائریکٹر پبلک ہیلتھ خیبرپختونخوا ڈاکٹر ارشاد روغانی کا کہنا تھا کہ میڈیا پر جو پروپیگنڈا چل رہا تھا میں نے خود وہاں جاکر اس کی چھان بین کی ہے۔
محکمہ صحت کی ٹیم نے متاثرہ علاقے کی مسجد میں آگاہی پیغام بھی دیا، مریض کے خاندان اور محلے میں سکریننگ بھی کی گئی، فی الحال کسی اور فرد میں علامات نہیں پائے گئے۔
