سندھ میں ڈینگی سے دو خواتین سمیت مزید 3 افراد جاں بحق

کراچی: (ویب ڈیسک) سندھ بھر میں ڈینگی سے دو خواتین سمیت مزید 3 افراد جاں بحق ہوگئے، جس کے بعد رواں سال مجموعی اموات 36 ہوگئی ہیں۔

محکمہ صحت سندھ کا کہنا ہے کہ جاں بحق ہونے والوں میں حیدرآباد کا ایک 50 سالہ مرد اور ایک 80 سالہ خاتون، جبکہ کراچی کی 55 سالہ خاتون شامل ہیں۔

حکام نے بتایا کہ گزشتہ 24 گھنٹے کے دوران صوبے کے مختلف ہسپتالوں میں ڈینگی کے 180 نئے مریض داخل ہوئے، جن میں سے 113 سرکاری ہسپتالوں اور 57 نجی ہسپتالوں میں داخل کئے گئے، اس وقت صوبے بھر کے سرکاری اور نجی ہسپتالوں میں 241 مریض زیر علاج ہیں، کراچی ڈویژن میں 44 مریض سرکاری ہسپتالوں میں داخل ہوئے، حیدرآباد میں 35 اور دیگر اضلاع سے 34 مریض داخل ہوئے۔

محکمہ صحت نے بتایا کہ گزشتہ 24 گھنٹوں میں کل 5 ہزار 229 ڈینگی ٹیسٹ کئے گئے، جن میں سے 774 مثبت آئے، اسی دوران 191 مریض صحت یاب ہو کر ہسپتالوں سے ڈسچارج ہوئے۔

حکام نے شہریوں سے اپیل کی ہے کہ وہ حفاظتی اقدامات کریں، مچھروں کی افزائش کے مقامات ختم کریں اور علامات ظاہر ہونے پر فوری طور پر طبی امداد حاصل کریں۔