ملتان: (دنیا نیوز) انسداد دہشت گردی فورس نے ملتان میں دہشت گردی کا منصوبہ ناکام بناتے ہوئے کالعدم تنظیم کے 4 دہشت گرد گرفتار کر لئے۔
سی ٹی ڈی حکام کے مطابق دہشت گردوں کو بائی پاس روڈ ملتان سے خفیہ اطلاع پر گرفتار کیا گیا۔ گرفتار دہشت گردوں میں عبدالسلام، لیاقت، واجد اللہ اور محمد احمد شامل ہیں، جن کا تعلق کالعدم تنظیم سے ہے۔
گرفتار دہشت گردوں کے قبضہ سے 5 دستی بم، آتشیں اسلحہ اور اہم نقشہ جات برآمد کر کے تفتیش کے لئے نامعلوم مقام پر منتقل کر دیا گیا ہے۔
سی ٹی ڈی حکام کا کہنا ہے کہ مذکورہ دہشت گردوں نے ابتدائی تفتیش کے دوران ملتان میں اہم سیاسی قائدین کو ہدف بنانے کی منصوبہ بندی کا اعتراف کیا ہے، تاہم ان سے مزید تفتیش جاری ہے۔
