اسلام آباد: (دنیا نیوز) شیخ رشید کا کہنا ہے مارچ سے پہلے جھاڑو پھر جائے گا، نواز شریف مریم نواز کیلئے این آراو ڈھونڈ رہے ہیں، ملک میں سیاست کے نام پر بھیڑیے آگئے، کیمرہ مین پر تشدد کا مقدمہ نوازشریف پر ہونا چاہئے تھا۔
وفاقی وزیر ریلوے شیخ رشید نے میڈیا سے گفتگو کرتے ہوئے کہا قومی دولت لوٹنے والے غداری کے مرتکب ہیں، یہ لوگ صرف اپنی اولاد کا سوچتے ہیں، کاش یہ صحافی کو بھی اپنی اولاد سمجھتے۔ انہوں نے کہا انصاف مساوی ہونا چاہیئے، پارلیمنٹ کے باہر صحافی پر تشدد بدمعاشی ہے، چیف جسٹس پاکستان معاملے کا نوٹس لیں۔
شیخ رشید کا کہنا تھا امریکا بھارت کو چین کیخلاف کھڑا کر رہا ہے، میری سیاسی بصیرت تھی کہ بھارت غیر جانبدار رہے گا اور امریکا کی جھولی میں کبھی نہیں گرے گا۔ انہوں نے کہا پاکستان دنیا کا سب سے حساس ترین ملک ہے، پاکستان جغرافیائی لحاظ سے حساس ترین ہے، ہم نے ملک کی ترقی نہیں کی، مال اکٹھا کرتے رہے، پاکستان نے چین کو دنیا کا ایک نیا براعظم دیا ہے۔
