کراچی: (دنیا نیوز) کراچی کے علاقے سائٹ ایریا میں سیاہی بنانے کی فیکٹری میں آگ لگ گئی، واقعے میں دو ملازمین جھلس گئے، فیکٹری میں موجود سارا سامان جل کر خاکستر ہوگیا۔ تیسرے درجے کی آگ پر فائربریگیڈ کی 11 گاڑیوں اور ایک اسنارکل نے تین گھنٹوں کی جدوجہد کے بعد قابو پا لیا۔
کراچی میں موسم تبدیل ہوتے ہی ایک کے بعد ایک آتشزدگی کا واقعہ، اطلاع ملی تو پہلے فائر بریگیڈ کی ایک گاڑی آگ بجھانے پہنچی۔ شدت اتنی تھی کہ فائر حکام نے آگ کو تیسرے درجے کی قرار دے کر شہر بھر سے مزید فائرٹینڈرز طلب کر لئے۔
کے ایم سی، پاکستان نیوی اور کے پی ٹی کے 11 فائر ٹینڈرز اور ایک اسنارکل نے آگ پر قابو پایا۔ فیکٹری مالک کا کہنا ہے کہ فائر بریگیڈ کی گاڑیاں تاخیر سے پہنچیں۔ آتشزدگی کے واقعے میں اطرف کی دو فیکٹریوں کو بھی جزوی نقصان پہنچا۔
