اسلام آباد: (دنیا نیوز) ملک بھر میں کورونا کے مثبت کیسز کی شرح 6.13 فیصد ہوگئی۔ ایبٹ آباد میں کورونا کی صورتحال سب سے زیادہ سنگین ہوگئی، جہاں 15.95 فیصد پازیٹو کیسز کی شرح ہے۔
نیشنل کمانڈ اینڈ آپریشن سنٹر کے مطابق کراچی 14.81 فیصد کورونا کیسز کی شرح کے ساتھ دوسرے جبکہ حیدر آباد 14.47 فیصد کے ساتھ تیسرے نمبر پر ہے۔ آزاد کشمیر میں کورونا کے مثبت کیسز کی شرح 12.54 فیصد، بلوچستان میں 2.71 فیصد، اسلام آباد میں 5.94 فیصد ہے۔ پنجاب میں کورونا مثبت کیسز کی شرح 4.06 فیصد، سندھ میں 8.61 فیصد ریکارڈ کی گئی۔ گلگت بلتستان میں 24 گھنٹے کے دوران کورونا کا کوئی نیا مریض سامنے نہیں آیا، گلگت بلتستان میں کورونا کے مثبت کیسز کی شرح صفر فیصد رہی۔
دوسری جانب نیشنل کمانڈ اینڈ آپریشن سینٹر کے تازہ ترین اعدادوشمار کے مطابق کورونا وائرس سے 55 افراد جاں بحق ہوگئے، جس کے بعد اموات کی تعداد 9 ہزار 929 ہوگئی۔ پاکستان میں کورونا کے تصدیق شدہ کیسز کی تعداد 4 لاکھ 73 ہزار 309 ہوگئی۔
گذشتہ 24 گھنٹوں کے دوران ایک ہزار 974 نئے کیسز رپورٹ ہوئے، پنجاب میں ایک لاکھ 36 ہزار 147، سندھ میں 2 لاکھ 11 ہزار 276، خیبر پختونخوا میں 57 ہزار 467، بلوچستان میں 18 ہزار 82، گلگت بلتستان میں 4 ہزار 850، اسلام آباد میں 37 ہزار 272 جبکہ آزاد کشمیر میں 8 ہزار 215 کیسز رپورٹ ہوئے۔
ملک بھر میں اب تک 65 لاکھ 89 ہزار 317 افراد کے ٹیسٹ کئے گئے، گذشتہ 24 گھنٹوں کے دوران 32 ہزار 205 نئے ٹیسٹ کئے گئے، اب تک 4 لاکھ 23 ہزار 892 مریض صحتیاب ہوچکے ہیں جبکہ 2 ہزار 263 مریضوں کی حالت تشویشناک ہے۔
پاکستان میں کورونا سے ایک دن میں 55 افراد جاں بحق ہوئے جس کے بعد وائرس سے مرنے والوں کی تعداد 9 ہزار 929 ہوگئی۔ پنجاب میں 3 ہزار 921، سندھ میں 3 ہزار 491، خیبر پختونخوا میں ایک ہزار 609، اسلام آباد میں 407، بلوچستان میں 182، گلگت بلتستان میں 101 اور آزاد کشمیر میں 218 مریض جان سے ہاتھ دھو بیٹھے۔
