لاہور: (دنیا نیوز) وزیراعلیٰ پنجاب سردار عثمان بزدار نے کہا ہے کہ کسی بھی مہذب معاشرے میں انبیاء کرام کی شان میں گستاخی کا تصور بھی نہیں کیا جا سکتا، آزادی اظہار کی آڑ میں نبی کریم ﷺ کی شان میں گستاخی ہرگز برداشت نہیں ہے۔
وزیراعلیٰ پنجاب کی جانب سے جاری بیان میں کہا گیا ہے کہ خاتم النبین حضرت محمد ﷺ کا احترام ہر مسلمان کے ایمان کا لازمی حصہ ہے۔ ہر مسلمان کا دل نبی کریم ﷺ کی محبت سے سرشار ہے۔
عثمان بزدار نے کہا کہ اللہ تعالیٰ نے نبی کریم ﷺ کو تمام جہانوں کیلئے رحمت بنا کر بھیجا۔ آپ ﷺ کی زندگی کو مجسم قرآن قرار دیا گیا جس میں سب کیلئے مکمل رہنمائی اور ہدایت موجود ہے۔
انہوں نے کہا کہ حضرت محمد ﷺ نے اسوہ حسنہ کے ذریعے امن وآشتی، احترام انسانیت، مساوات، عفو ودرگزر اور عدل وانصاف کا درس دیا۔ محسن انسانیت حضرت محمد ﷺ اپنے اعلیٰ کردار اور اسوہ حسنہ کے ذریعے دنیا کیلئے ایک مثال بنے۔
ان کا کہنا تھا کہ رسولِ اکرم ﷺ کی سنت سے مسائل کا حل افہام وتفہیم اور مکالمے کے ذریعے نکالنے کا درس ملتا ہے۔ نبی اکرم ﷺ کی محبت کا تقاضا ہے کہ ہم اپنے اختلافات کو مفاہمتی حکمت عملی کی روشنی میں حل کریں۔ موجودہ حالات میں سب کو تحمل، برداشت اور رواداری کا مظاہرہ کرنا ہوگا۔
