اسلام آباد: (دنیا نیوز) وزیر دفاع خواجہ آصف نے کہا ہے کہ جن مذاکرات کا پی ٹی آئی راگ الاپ رہی ہے، ان کا کوئی امکان نہیں۔
سماجی رابطے کی ویب سائٹ ٹوئٹر پر اپنا بیان جاری کرتے ہوئے وزیر دفاع خواجہ آصف نے کہا ہے کہ الیکشن ان شا اللہ آئینی وقت پر ہوں گے، سیاسی قوتوں کا قومی مسائل پر مذاکرات اور اتفاق رائے جمہوری مزاج کا حصہ ہے۔
تحریک انصاف کے لانگ مارچ پر تنقید کرتے ہوئے وزیر دفاع نے کہا کہ عمران خان سارے شوق پورے کر لیں، اس وقت بھارتی میڈیا ان کو بھرپور سرپرستی اور ائرٹائم دے رہا ہے، اس کو انجوائے کریں۔
اس سے قبل انہوں نے اپنے ایک دوسرے ٹوئٹ میں کہا تھا کہ عمران خان اقتدار کی ہوس میں اس مقام پہ پہنچ چکا ہے جہاں وطن کی محبت،شہدا کے خون کا تقدس اور رشتوں کا احترام کوئی حیثیت نہیں رکھتے، اس کے لیے اول آخر اس کی ذات ہے۔ اس کی زبان پاکستان دشمنی کی زبان، اپنے ورکروں کی تربیت کی بنیاد نفرت اور تقسیم ہے۔ اقتدار کی محرومی اسے وطن دشمنی پر لے آئی ہے۔
