اسلام آباد: (دنیا نیوز) وفاقی وزیر منصوبہ بندی احسن اقبال نے سرکاری پٹرول، سرکاری گاڑی کا استعمال جاری رکھنے کا فیصلہ کیا ہے۔
ذرائع کے مطابق وفاقی وزیر احسن اقبال نے وی ایٹ 4500 سی سی لینڈ کروزر گاڑی واپس لینے کیلئے خط لکھا ہے، انہوں نے سرکاری گاڑی یا سرکاری پٹرول لینے سے معذرت نہیں کی، واضح رہے وزیر اعظم کے منظور کردہ رولز کے تحت وفاقی وزیر 1800 سی سی گاڑی کا مجاز ہوتا ہے۔
یاد رہے کچھ روز قبل مسلم لیگ (ن) سے تعلق رکھنے والے وفاقی وزراء نے ملک کی مالی صورتحال کے پیش نظر بغیر تنخواہ کے کام کرنے کا فیصلہ کیا تھا، اس حوالے سے وزیر اعظم شہباز شریف نے مسلم لیگ (ن) کے کابینہ ارکان سے بغیر تنخواہ پر کام کرنے کی درخواست کی تھی۔
موجودہ وفاقی کابینہ میں شامل 34 وزراء میں سے 12 کا تعلق (ن) لیگ سے ہے اور 7 وزرائے مملکت میں سے 3 مسلم لیگ (ن) کے ہیں جبکہ 38 میں سے 14 معاونین خصوصی بھی بلا معاوضہ کام کرنے کی درخواست منظور کر چکے ہیں۔
