اسلام آباد: (دنیا نیوز) وفاقی وزیر اطلاعات مریم اورنگزیب نے کہا ہے کہ وزیر اعظم شہباز شریف متحدہ عرب امارات کا ایک روزہ دورہ کر کے وطن واپس پہنچ گئے ہیں۔
سماجی رابطے کی ویب سائٹ ٹوئٹر پر اپنے پیغام میں مریم اورنگزیب نے بتایا کہ وزیراعظم محمد شہباز شریف کی متحدہ عرب امارات کے صدر شیخ محمد بن زید النہیان سے صدارتی محل میں ملاقات ہوئی۔
وزیراعظم نے متحدہ عرب امارات کے صدر شیخ محمد بن زاید النہیان سے ان کے بھائی شیخ سعید بن زاید النہیان کی وفات پر تعزیت کی، شہباز شریف نے پاکستان کی حکومت اور عوام کی جانب سے شاہی خاندان کے ساتھ افسوس کا اظہار کیا۔
— Marriyum Aurangzeb (@Marriyum_A) July 28, 2023
شہباز شریف نے کہا کہ یو اے ای کے صدر سے اظہار تعزیت کرتے ہوئے کہا کہ آپ کے غم میں برابر کے شریک ہیں، وزیراعظم نے دعا کی کہ اللہ تعالیٰ مرحوم کو اپنے جوار رحمت میں اعلیٰ ترین مقام عطا فرمائے اور تمام اہل خانہ کو صبر جمیل دے۔
وفاقی وزیر نے بتایا کہ وزیراعظم جمعہ کی دوپہر خاص طور پر یو اے ای کے صدر سے ان کے بھائی کی وفات پر تعزیت کے لئے ابو ظہبی پہنچے تھے، اپنا ایک روزہ دورہ مکمل کر کے واپس پاکستان پہنچ گئے ہیں۔
