اسلام آباد: (دنیا نیوز) نگران وزیراعظم انوارالحق کاکڑ سے اقوام متحدہ میں پاکستان کے مستقل مندوب منیر اکرم اور پاکستان میں ایران کے سفیر رضا امیری مغل نے الگ، الگ ملاقات کی ہے۔
نگران وزیر اعظم انوار الحق کاکڑ سے ایران کے سفیر رضا امیری مغل کی ملاقات ہوئی جس میں پڑوسی ممالک کے درمیان قریبی برادرانہ تعلقات پر بات چیت کی گئی، نگران وزیراعظم نے ایران کے ساتھ تعلقات کو مزید مضبوط اور گہرا کرنے کے مضبوط عزم کا اعادہ کیا۔
— Prime Minister s Office (@PakPMO) September 1, 2023
انہوں نے اقتصادی اور سلامتی کے شعبوں میں تعاون بڑھانے پر توجہ دینے کی ضرورت پر زور دیا اور مند پشین سرحدی بازار کے حالیہ افتتاح پر بات چیت کی، انہوں نے کہا کہ بازار سرحدی علاقوں کی معاشی ترقی میں معاون ثابت ہو گا۔
انوار الحق نے مزید کہا کہ صدر رئیسی کی پڑوسی سب سے پہلے کی پالیسی علاقائی ترقی اور روابط کیلئے پاکستان کے وژن سے پوری طرح ہم آہنگ ہے، دونوں ممالک کو اپنے منفرد جغرافیائی محل وقوع سے فائدہ اٹھانا چاہیے۔
اس موقع پر ایرانی سفیر نے کہا کہ ایران دوطرفہ تعلقات بالخصوص معیشت، توانائی اور سلامتی کے شعبوں میں حالیہ مثبت سمت کو آگے بڑھانے کا خواہاں ہے۔
نگران وزیراعظم سے اقوام متحدہ میں پاکستان کے مستقل مندوب کی ملاقات
نگران وزیراعظم انوار الحق کاکڑ سے اقوام متحدہ میں پاکستان کے مستقل مندوب منیر اکرم کی ملاقات ہوئی، ملاقات میں منیر اکرم نے نگران وزیراعظم کو اقوام متحدہ کی جنرل اسمبلی کی تیاریوں کے حوالے سے بریفنگ دی۔
نگران وزیراعظم نے اقوام متحدہ کے پلیٹ فارم پر پاکستان کی مثبت نمائندگی کرنے پر منیر اکرم کے کردار کو سراہا۔
