اسلام آباد: (دنیا نیوز)عام انتخابات 2024 کے پیشِ نظر الیکشن کمیشن کی جانب سے کاغذاتِ نامزدگی کی جانچ پڑتال کی آسانی کیلئے آن لائن سہولت مرکز قائم کر دیا گیا۔
الیکشن کمیشن کے ترجمان کے مطابق آن لائن سہولت مرکز الیکشن کمیشن سیکرٹریٹ میں بنایا گیا ہے، سہولت مرکز کی معاونت نادرا، نیب، ایف آئی اے، ایف بی آر اور سٹیٹ بینک کر رہے ہیں۔
ترجمان الیکشن کمیشن کا کہنا ہے کہ آن لائن سہولت مرکز 24/7 کام کر رہا ہے، امیدواران کے کوائف ضروری کارروائی کیلئے متعلقہ اداروں کو بھجوائے جا رہے ہیں۔
یہ بھی پڑھیں:عام انتخابات 2024: امیدواروں کے کاغذات نامزدگی کی سکروٹنی کا عمل شروع
الیکشن کمیشن کے ترجمان کے مطابق ہدایت کی گئی ہے کہ سیکرٹری پاور ڈویژن اور سیکرٹری پٹرولیم ڈویژن بھی ریٹرننگ افسران سے امیدواران کی فہرستیں حاصل کریں۔
الیکشن کمیشن کے ترجمان کے مطابق ہدایت جاری کی گئی ہے کہ سیکرٹری نیشنل ٹیلی کمیونیکیشن اور سیکرٹری ہاؤسنگ بھی ریٹرننگ افسران سے امیدواران کی فہرستیں حاصل کریں، اسی طرح چاروں چیف سیکرٹریز اور چیئرمین سی ڈی اے کو بھی ہدایت کی گئی ہے کہ ریٹرننگ افسران سے امیدواران کی فہرستیں حاصل کریں۔
مزید پڑھیں:انتخابات کا اہم مرحلہ مکمل، اعتراضات سننے کیلئے اپیلٹ ٹربیونلز تشکیل
ترجمان الیکشن کمیشن نے بتایا کہ امیدواروں کی فہرست کا اجراء 24 دسمبر 2023ء کو کیا جا چکا ہے، نادہندہ امیدواران کو ہدایت کی گئی ہے کہ کاغذات کی جانچ پڑتال کے دوران 25 تا 30 دسمبر آر او سے رجوع کریں، نادہندہ امیدواران سے واجبات کی وصولی یقینی بنائی جائے گی۔
الیکشن کمیشن کی جانب سے ہدایت کی گئی ہے کہ حکومت کے تمام وفاقی اور صوبائی ادارے فوری ریٹرننگ افسران سے رابطہ کریں۔
