شکرگڑھ: (دنیا نیوز) دانیال عزیز نے کہا کہ الیکشن کمیشن اور وزیراعلیٰ پنجاب سے فری اینڈ فیئر الیکشن کرانے کا مطالبہ کرتا ہوں۔
دانیال عزیز نے حلقہ این اے 75 میں میڈیا سے گفتگو کرتے ہوئے کہا کہ مریم نواز بدلے ہوئے حالات میں ظفروال آرہی ہیں اور ہم زیر عتاب ہیں، 2018ء میں بڑے لیڈروں نے جلسہ کرانے سے انکار کیا ہم نے جلسہ کرایا، نوازشریف جیل میں تھے میں نے مریم نواز کا ظفروال میں جلسہ کرایا۔
انہوں نے کہا کہ ہم نے نوازشریف سے کہا آپ مریم کو بھیجیں ہم جلسہ کرائیں گے،احسن اقبال لوگوں کو جلسہ میں شرکت کرنے سے روکتے رہے، احسن اقبال، ان کے ایم پی اے اور ان کا کوئی رشتہ دار مریم نواز کے جلسہ میں شریک نہیں ہوا، وہ مشکل دن تھے تب طے ہونا تھا کہ لوٹا کون ہے ساتھی کون۔
دانیال عزیز نے مزید کہا کہ مریم نواز اور احسن اقبال کو وہ دن تو اچھی طرح یاد ہی ہوگا، پارٹی بہتر فیصلہ کر سکتی ہے کہ مریم نواز نے میرے حلقہ میں جلسہ کرنا ہے یا نہیں۔
انہوں نے مزید کہا کہ محسن نقوی سے درخواست ہے ترقیاتی منصوبوں کا معائنہ چھوڑیں، الیکشن کا معائنہ کریں، محسن نقوی دیکھیں نارووال، شکرگڑھ اور ظفروال میں کیا ہو رہا ہے، محسن نقوی منصفانہ الیکشن کرانے آئے ہیں، وہ دیکھیں لوگوں کو کیسے مجبور کیا جا رہا ہے۔
دانیال عزیز نے کہا کہ الیکشن کمیشن نے آر پی او گوجرانوالہ اور ڈی پی او نارووال کو لیول پلیئنگ فیلڈ کے لئے لیٹر لکھا ہے، ڈی پی او کہتے ہیں درخواست نہیں آئی، میری جمع درخواستوں کے ثبوت موجود ہیں، انتظامیہ نے میرے ساتھی تاجر کو اتنے نوٹس دیئے کہ اسے ہارٹ اٹیک ہوگیا۔
گفتگو کرتے ہوئے انہوں نے مزید کہا کہ پولیس گردی اور انتقامی کارروائیوں سے ن لیگ کے خلاف نفرت پیدا ہو رہی، 8 تاریخ کے بعد احسن اقبال عوام کے سامنے کیسے پیش ہوں گے، یہ کیسا امن کا پیغام ہے۔
