وزیر اعظم کا کابینہ ارکان کیساتھ جی ایچ کیو کا دورہ، آرمی چیف سے ملاقات

راولپنڈی: (دنیا نیوز) انٹرسروسز پبلک ریلیشنز (آئی ایس پی آر) کے مطابق وزیر اعظم شہباز شریف نے جی ایچ کیو کا دورہ کیا، وفاقی وزراء بھی وزیر اعظم کے ساتھ تھے۔

پاک فوج کے شعبہ تعلقات عامہ کے مطابق آرمی چیف جنرل سید عاصم منیر نے وزیر اعظم شہباز شریف کا استقبال کیا، وزیر اعظم کو گارڈ آف آنر پیش کیا گیا، اس موقع پر وزیر اعظم نے یادگار شہدا پر پھول چڑھائے۔

آئی ایس پی آر کے مطابق وزیراعظم شہباز شریف کی آرمی چیف جنرل سید عاصم منیر سے ملاقات بھی ہوئی، ملاقات میں وزیر اعظم اور کابینہ ارکان نے عسکری قیادت سے قومی سلامتی، علاقائی استحکام اور فوجی تیاریوں پر بات کی۔

پاک فوج کے شعبہ تعلقات عامہ کے مطابق وزیر اعظم شہباز شریف کو سلامتی کی موجودہ صورتحال، خطرات سے نبرد آزما ہونے کی تیاریوں سے آگاہ کیا گیا، وزیر اعظم اور کابینہ ارکان نے پا ک فوج کی پیشہ وارانہ تیاریوں کو سراہا۔

وزیر اعظم نے دہشت گردی کے خلاف پاک فوج کی قربانیوں کو خراج تحسین پیش کیا، شہباز شریف نے پاک فوج کی ملک کے تحفظ کے لیے کارروائیوں اور جذبہ کو سراہا، انہوں نے امن اور استحکام کے لیے پاک فوج کے عزم کی تعریف کی۔

آئی ایس پی آر کے مطابق وزیر اعظم شہباز شریف کو انسداد دہشت گردی آپریشنز کے حوالے سے بھی بریف کیا گیا۔