راولپنڈی: (دنیا نیوز) سابق ڈپٹی سپرنٹنڈنٹ اڈیالہ جیل محمد اکرم کی گرفتاری سامنے آنے پر درخواست واپس لے لی گئی۔
لاہور ہائیکورٹ راولپنڈی بنچ کے جج چودھری عبدالعزیز نے درخواست واپس لینے کی بنیاد پر خارج کر دی۔
درخواست سابق ڈپٹی سپرنٹنڈنٹ اڈیالہ جیل کے لاپتہ ہونے کے بعد دائر کی گئی تھی۔
دوسری جانب اینٹی کرپشن شیخوپورہ نے سابق ڈپٹی سپرنٹنڈنٹ محمد اکرم کے خلاف رشوت کا الزام لگا کر گرفتاری ڈال دی ہے، محمد اکرم پر 95 ہزار روپے رشوت کا الزام ہے۔
اسسٹنٹ ایڈووکیٹ جنرل نے عدالت کو بتایا کہ شیخوپورہ اینٹی کرپشن عدالت سے جسمانی ریمانڈ بھی حاصل ہو چکا ہے۔
مقدمہ اور گرفتاری بنیاد پر وکیل صفائی ایمان مزاری ایڈووکیٹ نے درخواست واپس لی۔
بعدازاں لاہور ہائیکورٹ راولپنڈی بنچ کے باہر وکیل ایمان مزاری نے میڈیا سے گفتگو کرتے ہوئے کہا کہ ہم نے پٹیشن دائر کی حبس بے جا کی، محمد اکرم بازیاب ہوچکے ہیں، شیخوپورہ میں محمد اکرم پر کیس لانچ کیا گیا ہے، ہم نے آج پٹیشن واپس لے لی ہے، شیخوپورہ میں وکیل موجود ہیں جو اس کیس کو دیکھ رہے ہیں۔
