پشاور: (دنیا نیوز) مسلم لیگ ن کے رہنما کیپٹن (ر) صفدر نے کہا کہ بہت جلد قائد مسلم لیگ ن خیبرپختونخوا سے سیاسی مہم کا آغاز کرنے والے ہیں، قائد ن لیگ سوات اور دیگر علاقوں کا دورہ کرینگے۔
تقریب سے خطاب کرتے ہوئے مسلم لیگ ن کے رہنما کیپٹن ریٹائرڈ صفدر کا کا کہنا تھا کہ ملک ترقی کر رہا ہے، یہ پانچ سال ملے تو اگلے پانچ سال ضرور ملیں گے۔
انہوں نے کہا کہ مریم نواز کو کہتا ہوں وہ ایک ہفتہ اس صوبے کو بھی دیں، اگر وہ نہیں آتیں تو خیبرپختونخوا کے وزیر اعلیٰ کو تھوڑی تربیت دیں۔
کیپٹن ریٹائرڈ صفدر نے کہا کہ خیبرپختونخوا کا انتہائی برا حال ہوگیا ہے، خیبرپختونخوا کا حال تورا بورا سے زیادہ مختلف نہیں ہے۔
انہوں نے مزید کہا کہ باقی صوبوں کے مقابلے میں خیبرپختونخوا بہت پیچھے رہ گیا ہے، ہم خیبرپختونخوا کو آگے لے جانا چاہتے ہیں۔
رہنما ن لیگ نے کہا کہ پنجاب اور وفاق ترقی کر رہا ہے، ڈالر اور پٹرول کی قیمتیں رک گئی ہیں، خیبرپختونخوا حکومت کا ایک ہی کام ہے، گاڑیاں بھرو اور ڈی چوک چلو۔
