اسلام آباد: (دنیا نیوز) وزیراعظم شہباز شریف نے کہا ہے کہ سعودی عرب پاکستان کا برادر ملک ہے، سعودی عرب کی خودمختاری اور سالمیت پر کبھی آنچ آنے نہیں دیں گے۔
وفاقی کابینہ کے اجلاس میں اظہار خیال کرتے ہوئے وزیراعظم شہباز شریف کا کہنا تھا کہ دورہ دبئی کے دوران صدر یو اے ای سے دوطرفہ تعلقات و سرمایہ کاری سے متعلق گفتگو ہوئی، صدر محمد بن زید النہیان کے ساتھ ملاقات میں آرمی چیف جنرل سید عاصم منیر بھی موجود تھے۔
انہوں نے کہا کہ دبئی میں گورنمنٹس سمٹ میں پاکستان کی نمائندگی کی، سمٹ کے موقع پر اہم دوطرفہ ملاقاتیں بھی کیں، ڈی پی ورلڈ کے سی او سمیت وفد سے بھی ملاقات ہوئی، دبئی کے فرمانروا سمیت سری لنکا، کویت اور بوسنیا کی اعلیٰ قیادت سے ملاقاتیں کیں۔
ان کا کہنا تھا کہ دبئی میں آئی ایم ایف کی ٹیم سے تفصیلی بات چیت ہوئی، ایم ڈی آئی ایم ایف نے احسن انداز میں معاملات کو آگے بڑھانے پر پاکستانی ٹیم کی تعریف کی، سربراہ آئی ایم ایف نے کہا انڈسٹری تب چلے گی جب پیداواری لاگت کم ہوگی، عالمی مالیاتی ادارے کے سربراہ کے تعریفی کلمات حوصلہ افزاء ہیں۔
شہبازشریف نے بتایا کہ دبئی میں پاکستانی سرمایہ کاروں سے بھی ملاقات ہوئی، پاکستانی سرمایہ کاروں کو پاکستان آنے کی دعوت دی، کاروبار میں آسانی کی طرف مزید توجہ کی تجویز دی گئی۔
’میکرواکنامک استحکام سے پائیدار ترقی و خوشحالی کی راہ پر گامزن ہیں‘
وزیراعظم نے کہا کہ میکرواکنامک استحکام سے پائیدار ترقی و خوشحالی کی راہ پر گامزن ہیں، شرح نمو میں بہتری کیلئے مزید کام کرنا ہے، معاشی ترقی کی رفتار بڑھانے کیلئے بہترین اقدامات کر رہے ہیں، پاکستان عظیم ملک بنے گا اور اپنے پاؤں پر کھڑا ہوگا۔
ان کا کہنا تھا کہ سمندر پار پاکستانیوں کی طرف سے ترسیلات زر میں اضافہ ریکارڈ ہوا ہے، گزشتہ ماہ 3 ارب ڈالر ترسیلات زر آئیں، ترسیلات زر میں اضافہ سمندر پار پاکستان کے حکومت پر اعتماد کا عکاس ہے، سمندر پار پاکستانیوں کو سہولیات دینے کیلئے پرعزم ہیں۔
انہوں نے کہا کہ سعودی عرب پاکستان کا بہترین دوست اور بااعتماد ساتھی ہے، پاکستان سعودی عرب کی خودمختاری اور جغرافیائی سالمیت کی ہمیشہ حمایت کرتا رہے گا، سعودی عرب کی سالمیت پر پاکستان کبھی آنچ نہیں آنے دے گا۔
’فلسطین میں بربریت اور نسل کشی کا سلسلہ رکنا چاہیے‘
وزیراعظم کا کہنا تھا کہ دبئی سمٹ میں فلسطین کے حوالے سے اپنا مؤقف بھرپور انداز میں دنیا کے سامنے پیش کیا، 50 ہزار فلسطینی شہید ہو چکے ہیں، فلسطین میں بربریت اور نسل کشی کی اس بدترین مثال اور کیا ہو سکتی ہے، فلسطین میں بربریت اور نسل کشی کا سلسلہ رکنا چاہیے، امید ہے کہ فلسطین میں امن قائم ہوگا۔
انہوں نے بتایا کہ ترکیہ کے صدر پاکستان کا دو روزہ دورہ کر رہے ہیں، ان کا دورہ انتہائی اہمیت کا حامل ہے، رجب طیب اردگان اسلامک دنیا کے بہترین لیڈر ہیں، ترکیہ کے صدر کے دورہ پاکستان کے دوران دو طرفہ تعلقات، تجارت کے فروغ سے متعلق سمجھوتوں پر دستخط ہوں گے۔
شہبازشریف کا مزید کہنا تھا کہ لیبیا کشتی حادثے پر بہت افسوس ہے، حادثے میں کچھ پاکستانیوں کی جانیں گئی ہیں، انسانی سمگلنگ کی روک تھام کیلئے اقدامات کر رہے ہیں، کالے دھندے کا ہمیشہ کیلئے خاتمہ ہونا ضروری ہے۔
