راولپنڈی :(دنیا نیوز) خیبر پختونخوا میں سکیورٹی فورسز کے 5 الگ الگ آپریشنز میں 13 خوارج جہنم واصل کردیئے گئے ۔
پاک فوج کے شعبہ تعلقات عامہ (آئی ایس پی آر ) کے مطابق سکیورٹی فورسز نے کارروائیاں خیبرپختونخوا میں کیں، سکیورٹی فورسز نے ڈیرہ اسماعیل خان کے علاقے کلاچی میں انٹیلی جنس کی بنیاد پر آپریشن کیا۔
آئی ایس پی آر کے مطابق ڈی آئی خان میں آپریشن کے دوران 5 خوارج کو جہنم واصل کر دیا گیا، لکی مروت میں کارروائی کے دوران 2 خوارج دہشتگردوں کو ہلاک کیا گیا۔
اسی طرح شمالی وزیرستان کے علاقوں دوسالی اور ٹپی میں دو مختلف آُپریشنز کے دوران شدید فائرنگ کے تبادلے میں 5 خوارج جبکہ ضلع خیبر میں کارروائی کے دوران ایک خوارج کو جہنم واصل کیا گیا۔
آئی ایس پی آر کا کہنا ہے کہ ہلاک دہشتگردوں میں شاہ گل عرف روحانی بھی شامل ہے، دہشتگرد سیکیورٹی فورسز اور بے گناہ شہریوں پر حملوں میں ملوث تھے، بھاری مقدار میں اسلحہ اور گولہ بارود برآمد کرلیا گیا۔
ترجمان پاک فوج کے مطابق علاقے میں دیگر ممکنہ خوارج کے خاتمے کیلئے سینی ٹائزیشن آپریشن جاری ہے، سکیورٹی فورسز ملک سے دہشت گردی کے خاتمے کیلئے پُرعزم ہیں۔
