راولپنڈی: (دنیا نیوز) پاکستان ایئر فورس کا دستہ سعودی عرب سے واپس پہنچ گیا۔
پاک فوج کے شعبہ تعلقات عامہ (آئی ایس پی آر) کے مطابق دستے میں جے ایف 17 بلاک تھری لیڈ فائٹر ایئر کرافٹ، جنگی پائلٹس، تکنیکی عملہ شامل تھا، دستے نے سپیئرز آف وکٹری 2025ء میں حصہ لیا، فائٹرز نے پاکستان سے سعودی عرب اور پھر واپسی کی نان سٹاپ پرواز کی۔
آئی ایس پی آر کے مطابق فضا میں ایندھن بھرنے کا مظاہرہ کیا گیا، فخر پاکستان جے ایف 17 تھنڈر بلاک تھری نے اپنی غیر معمولی آپریشنل صلاحیتوں کا مظاہرہ کیا، طیاروں کی آپریشنل صلاحیت اور تکنیکی صلاحیت کی وسیع پیمانے پر تعریف کی گئی۔
پاک فوج کے شعبہ تعلقات عامہ نے مزید بتایا کہ مشق میں امریکا، برطانیہ، فرانس سمیت دیگر ممالک کی افواج نے حصہ لیا، مشق کا مقصد شریک فضائی افواج کے درمیان باہمی تعاون کی توثیق کرنا تھا۔
