راولپنڈی: (دنیا نیوز) پی ٹی آئی رہنماؤں کی اڈیالہ جیل میں بانی پی ٹی آئی سے ملاقات نہ ہوسکی۔
عمر ایوب، گوہر ایوب، اسد قیصر، جنید اکبر، حامد رضا سمیت تمام رہنما ملاقات کئے بغیر اڈیالہ جیل سے واپس روانہ ہو گئے، اس دوران اڈیالہ جیل اور گرد و نواح میں بارش بھی جاری رہی، خیبر پختونخوا کے وزیر سہیل آفریدی، عاقب اللہ اور دیگر صوبائی وزرا واپس روانہ ہوگئے۔
اپوزیشن لیڈر عمر ایوب نے میڈیا سے گفتگو کرتے ہوئے کہا کہ ایک گھنٹے سے اڈیالہ جیل کے باہر کھڑے رہے، ملاقات کی اجازت نہیں دی گئی، ہماری ملاقات عدالتی احکامات پر ہونی تھی، بانی پی ٹی آئی نے مجھ سمیت 6 پارٹی رہنماؤں کے نام خود دیئے تھے۔
انہوں نے کہا کہ بانی پی ٹی آئی آج ہمارے ساتھ ملنا چاہتے تھے، اڈیالہ جیل انتظامیہ نے ہمیں ملنے نہیں دیا، جنید اکبر، صاحبزادہ حامد رضا، کنول شوذب تیمور جھگڑا اور میں ملنے آئے تھے، بارش میں ہم کھڑے رہے، موسم بھی خراب ہے لیکن ملنے نہیں دیا گیا۔
عمر ایوب نے کہا کہ جیل ٹرائل کی سماعتوں کی لمبی تاریخیں ڈالی جا رہی ہیں، میری چیف جسٹس آف پاکستان سے ملاقات ہوئی تھی، ان کے سامنے ساری صورت حال رکھی تھی، ماتحت عدالتیں لمبی تاریخیں دے رہی ہیں۔
انہوں نے کہا کہ چیف جسٹس سے درخواست کی تھی بانی پی ٹی آئی کے بنیادی حقوق سلب کئے جا رہے ہیں، ہم نے چیف جسٹس آف پاکستان کے سامنے اپنے تمام اسیران کے مسائل رکھے تھے۔
عمر ایوب نے کہا کہ آج اپوزیشن نے آئین اور قانون کی حکمرانی کے بارے بات کی ہے، ن لیگ اور پیپلز پارٹی فارم 47 اور کمپرومائزڈ لوگ ہیں۔
